په بلخ ولایت کې د یوې مدرسې جوړولو لپاره ځمکه ورکړل شوه.
دبلخ ولايت دهدادي ولسوالۍ يوې دين دوستې مور ، د خاص پز په کلي کې د نورالمدارس مدرسې جوړولو لپاره خپله ۴۰۰مترمربع ځمکه چې ٢٥٠ زره افغانۍ ارزښت لري، مرسته وکړه.
د يادې ځمکې اسناد د پوهنې رياست مسؤلينو، مخورو، علماؤ او قومي مشرانو په ګډون د يوې غونډې په ترڅ کې د دهدادي ولسوالۍ پوهنې آمريت ته وسپارل شول.
د سيمه ييزو خلکو په خبره، دې سپېڅلې مور غوښتل چې خپله ځمکه په ۲۵۰ زره افغانیو وپلوري او د بیت الله شریف حج ته ولاړه شي، خو د خپل بوډاتوب، جسمي کمزورۍ او د اسلام له سپېڅلي دین سره د زیاتې لېوالتیا له امله یې خپله ځمکه، يادې ديني مدرسې جوړولو لپاره وقف کړه.
د بلخ پوهنې مسؤلینو په خپلو خبرو کې د رسول الله صلی الله علیه وسلم مبارک حدیث په یادولو سره مدرسې ته د ځمکې ورکول یوه دوامداره صدقه وبلله او د الله تعالی ج له دربار څخه يې ورته دلوی اجر غوښتنه وکړه.
