په بغلان ولایت کې د یو باب ښوونځي بیارغونې چارې پیل شوې
د بغلان ولایت پوهنې ریاست څخه په خپره شوې خبرپاڼه کې ویل شوي، چې د یاد ولایت د مرکزي بغلان په سیمه کې د شیخ جلال عالي لېسې بیارغونې او اساسي ترمیم چارې د پوهنې رئیس الحاج مولوي محمد نور عزیزي له خوا په رسمي ډول پرانیستل شوې.
د مسئولینو په وينا، ياده لېسه د وروستيو سېلابونو له امله وېجاړه شوې، چې د بيارغونې چارې يې د يو مرستندویه بنسټ په مرسته ترسره کېږي او ۶ مېليونه افغانۍ لګښت پرې راځي.
د يادې لېسې کارکوونکو او زده کوونکو د خپلې لېسې د بيارغونې په پيل خوښي څرګنده کړه او د زده کړو د آسانتياوو برابرولو په برخه کې يې د پوهنې وزارت د رهبرۍ هڅې وستايلې.
