لوګر کې یوه ښوونځي ته ودانۍ جوړه شوه

پوهنې وزارت_لوګر: د لوګر د محمدآغې ولسوالۍ د شهید محمد سلیم لعل ستانکزي ښوونځي لپاره نوې جوړه شوې ودانۍ ګټې اخیستنې ته وسپارل شوه.
د یاد ښوونځي د پرانیستنې په مراسمو کې والي الحاج محمد انور اسحاق زي،د پوهنې رئیس عبدالوکیل کلیوال،د ولایتي شورا غړو، امنیتي مسوولینو او ځینو نورو محلي چارواکو برخه اخیستې وه.
د یاد ښوونځي پر جوړولو شاوخوا ۱۴،۱ میلیونه افغانۍ لګول شوي،چې د ولایتي غیر مشروط په بودجې جوړ شوی دی.
دغه ښوونځی ۸ درسي ټولګي، ۴ اداري خونې، د لابراتوار او کتابتون لپاره دوه بیلا بیلې څانګې او نوري ښوونیږي اسانتیاوي لري.
نوموړی ښوونځی په یوه وخت کې د ۴۸۰ زده کوونکو د ځایولو وړتیا لري، چې اوس په کې ۳۴۳ زده کوونکي په زده کړو بوخت دي.
یاد ښوونځی پر ۱۳۸۸ کال تاسیس شوی، چې تر اوسه ودانۍ نه درلوده او زده کوونکو یې تر شنه آسمان لاندې زده کړې کولې.
د دغه ښوونځي د احاطې دېوال، ۸ تشنابونه او د اوبو څاه دوه کاله مخکې د ولسمشر محمد اشرف غني په شخصي لګښت جوړ شوي دي.
د لوګر په محمدآغې ولسوالۍ کې ۶۴ ښوونځي شتون لري، چې په روان کال کې به ۳۹ ښوونځیو ته ودانۍ او اړین ملحقات جوړې شي.