لوګر کې زده کوونکو ته د کانکور د تیاري وړیا کورسونه جوړ شول
د پوهنې وزارت، لوګر: د لوګر ولایت د مرکز اړوند د نجونو او هلکانو د یو شمېر لېسو د دولسمو ټولګیو زده کوونکو ته د کانکور د چمتوالي کورسونه پیل شول.
دا کورسونه د پوهنې ریاست د لارښوونې له مخې د ساینس او ښوونیزې ټکنالوژۍ مرکز له خوا جوړ شول چې د دولسمو ټولګیو ۳۰۰ تنو زده کوونکو ته د کانکور د تیاري او ساینسي مضمونونو په برخه کې زده کړې ورکول کېږي څو زده کوونکي د راتلونکي کال د کانکور ازموینې ته چمتوالی ونیسي.
د لوګر د پوهنې رئیس سید عزیز احمد هاشمي د یادو کورسونو جوړول د دولسمو ټولګیو د زده کوونکو لپاره ډېر ضروري وبلل او د دولسمو ټولګیو له ټولو زده کوونکو نه یې غوښتنه وکړه، چې په جوړ شویو کورسونو کې ګډون وکړي او د کانکور آزموینې ته چمتوالی ونیسي.
هغه زیاته کړه، چې ډېر ژر به په یو شمېر نورو ولسوالیو کې هم د دولسمو ټولګیو زده کوونکو ته ورته کورسونه جوړ کړي.
د یادونې وړده، چې د لوګر د پوهنې ریاست په تېرو کلونو کې هم د دولسمو ټولګیو زده کوونکو ته ورته کورسونه جوړ کړي دي.
