لوګر کې د نجونو یو تړلی ښوونځی بېرته فعال شو
د لوګر ولایت د خوښۍ ولسوالۍد سرې غونډۍ د نجونو یو تړل شوی ښوونځی د زده کوونکو پر مخ بېرته پرانیستل شو.
یاد ښوونځی څلور کاله مخکې د امنیتي ستونزو له امله تړلی شوی وه، چې بېرته د پوهنې ریاست ، دیني عالمانو او قومي مشرانو په هلو ځلو فعال شو.
نوموړی ښوونځی په ۱۳۹۱ لمریز ښوونیز کال تاسیس شوی، چې د کلیوالو له خوا په یوه ورکړل شوي کور کې په فعالیت پیل وکړ.
دغه ښوونځی دا مهال دوه لومړي ټولګي او یو دویم ټولګی لري، چې شاوخوا ۱۲۰ نجونې او هلکان په کې شامل شوي دي.
د لوګر د پوهنې رئیس عبدالوکیل کلیوال د یاد ښوونځي پر فعالېدو خوښي څرګنده کړه او د سرې غونډۍ له اوسېدونکو یې غوښتنه وکړه، چې خپل ماشومان ښوونځي ته ولېږي.
په خوښۍ ولسوالۍ کې دا مهال د نجونو او هلکانو ۲۲ ښوونځي شتون لري،چې ټول د زده کوونکو پر مخ فعال دي.
د یادې ولسوالۍ په ښوونځیو کې څه باندې ۷ زره زده کوونکي زده کړې کوي، چې له دې ډلې شاوخوا ۳ زره یې نجونې دي.
د یادونې وړده، چې په ټول لوګر کې د نجونو او هلکانو ۲۷۳ ښوونځي شته، چې دا مهال ټول د نجونو او هلکانو پر مخ پرانیستي دي.
