لوګر ولایت کې د ۱۲مېلیونه ۳۰۰زره افغانیو په لګښت، د درې بابه ښوونځیو پروژې پرانیستل شوې
پوهنې وزارت له لوري، د یو مرستندویه بنسټ په مالي ملاتړ، د لوګر ولایت محمدآغې ولسوالۍ اړوند، د بي بي آمنې، سنګ سوراخ او حاجیانو ښوونځیو رغنیزې پروژې بشپړې او د یاد ولایت پوهنې مسئولینو په حضور کې ګټې اخیستنې ته وسپارل شوې. په دغو پروژو کې د ښوونځیو د ودانیو ترمیم، لمریزې برېښناسیسټمونه، د څښاک پاکو اوبو شبکې او یو شمېر نور اړین ملحقات شامل دي. د یادو پروژو ټولیز لګښت ۱۲ مېلیونه ۳۰۰زره افغانۍ اټکل شوی، چې د پوهنې د یوې همکارې ادارې لخوا ورکړل شوی دی. د لوګر پوهنې مسئولینو، د همدغو پروژو د پرانيستې په مراسمو کې خلکو ته ډاډ ورکړ، چې د پوهنې وزارت ژمن دى، تر څو د هېواد بچیانو لپاره متوازن ښوونيز او روزنیز چوپړونه وړاندې کړي. په غونډه کې ځایي خلکو د خپلو اولادونو ښوونې او روزنې ته د پوهنې وزارت د مشرتابه له پاملرنې مننه وکړه. د یادونې وړ ده، چې تر دې وړاندې هم په دغه ولایت کې د دریو نورو ښوونځیو ورته رغنیزې پروژې ګتې اخیستنې ته سپارل شوي دي.
