لوګر ولایت په ټولو دولتي او خصوصي ښوونځیو کې کلنۍ ازموینې پیل شوې
د پوهنې وزارت، لوګر: د لوګر ولایت په ۲۷۳ دولتي او په ۲۲ خصوصي ښوونځیو کې د ۱۳۹۹ ښوونیز کال د زده کوونکو کلنۍ ازموینې پیل شوې.
د یادې ازموینې د پیل په مراسمو کې چې د کلنګار جهادي د هلکانو په لېسه کې جوړه شوې وه د پوهنې رئیس سید عزیز احمد هاشمي، د پوهنې ښاري آمریت د نظارت آمر انجینر اسد الله عباسي او د نظارت غړو برخه اخیستې وه.
د لوګرد پوهنې رئیس سید عزیزاحمد هاشمي د یادې ازموینې د پیل په مراسمو کې له ټولو ښوونکو څخه غوښتنه وکړه، چې ټولې ازموینې د پوهنې وزارت د ازموینې کړنلارې له مخې واخلي.
هغه زیاته کړه، چې د لوګر په ټولو دولتي او خصوصي ښوونځیو کې د زده کوونکو د کلنۍ ازموینې د اخیستلو بهیر ښه پرمخ روان دی.
د یادونې وړده، چې په دولتي ښوونځیو کې له لومړي ټولګي څخه تر دولسم ټولګي پورې ۱۴۷۴۲۳ زده کوونکي کلنۍ ازموینه ورکوي چې ۴۵۳۷۲ یې نجونې دي.
