له ولایتونو څخه د ښوونیزو کړنو څو لنډ خبرونه
بغلان
د بغلان ولایت پوهنې رئیس الحاج مولوي محمد نور عزیزي د ياد ولایت په مرکز کې د سید جمال الدین افغان عالي لېسې څخه لیدنه وکړه او د یادې لېسې له اداري او تحصیلي چارو څخه یې د کتنې پرمهال مسئولینو ته لارښوونه وکړه، چې د زده کوونکو په ښوونه او روزنه کې ديني مسايلو ته جدي پاملرنه وکړي.
دایکنډي
د دایکنډي ولایت پوهنې ریاست کاري غونډه د ياد ولایت پوهنې رئیس الحاج مفتي رحمت الله مدثر تر څارنې لاندې، د اړوندو ادارو د مسؤلینو په ګډون جوړه شوه.
په دې ناسته کې د همکارو بنسټونو د فعالیتونو، د سیمه ییزو زده کړو ټولګیو ته د پاملرنې، د ښځینه زده کوونکو لپاره د خوندي ښوونيز چاپېریال رامنځته کولو او نورو اړينو مسايلو په اړه خبرې وشوې.
پنجشېر
د پنجشېر ولايت پوهنې رياست کاري غونډه د ياد رياست د اسلامي زده کړو د آمر تر څارنې لاندې جوړه شوه.
د يادې غونډې د جوړېدو موخه، په سیمه ییزو مدارسو کې د ښوونکو د ګمارلو، د پوهنې د کیفیت لوړولو، د کاري بهیر د ښه والي او د یاد ولایت د ولسوالیو د ښوونځیو د ستونزو د حل په اړه خبرې اترې وشوې.
ننګرهار
د ننګرهار ولایت پوهنې ریاست او د ياد ولایت د خراسان پوهنتون ترمنځ د همکارۍ تفاهم لیک لاسلیک شو.
د ياد تفاهم لیک له مخې، خراسان پوهنتون هغو زده کوونکو ته چې د ننګرهار پوهنې ریاست له لوري د عربي او انګلیسي ادبیاتو په څانګو کې د ماسټرۍ په پروګرام کې معرفي کېږي، ۵۰ سلنه تخفیف ورکوي.
بدخشان
آغا خان بنسټ د بدخشان د پوهنې ریاست کارکوونکو ته د (د انسان محور طرحه) تر سرلیک لاندې یو ورځنی ښوونیز سیمینار جوړ کړ.
د ياد ولايت پوهنې رئيس مولوي محراب الدين اقبال، د ياد پروګرام له جوړېدو خوښي څرګنده کړه او ياد پروګرام يې د پوهنې کارکوونکو د پوهاوي او ظرفيتونو لوړولو په برخه کې اغېزناک وباله.
په پای کې نوموړي د دا ډول پروګرامونه د دوام غوښتنه وکړه.
