له ولایتونو څخه د پوهنې څو لنډ خبرونه
لوګر
په لوګر ولایت کې یوه خیریه بنسټ د یاد ولایت د دیني مدارسو، دارالاېتامونو او دارالعلومونو ۱۳۵۰ یتیمانو او اړمنو زده کوونکو ته، د دوه میلیونه افغانیو په ارزښت ژمنۍ جامې چمتو او ووېشلې.
یادې جامې د هغو مراسمو په ترڅ کې ووېشل شوې، چې پکې د لوګر والي مولوي ضياء الرحمن مدني، د پوهنې رئيس مولوي جنت ګل عزيز او ديني علماوو ګډون درلود.
د یاد ولایت والي او د پوهنې رئیس له دغه خیریه بنسټ څخه مننه او قدرداني وکړه.
د یو بل خبر له مخې:
د لوګر ولايت پوهنې رئيس د يادې ادارې له کارکوونکو سره د ليدنې پر مهال، هغوى ته د ښوونيزو چارو د لا ښه والي په موخه لازمې لارښوونې وکړې او د هېواد د بچيانو په وړاندې يې د خپلو مسئوليتونو په اړه پوهاوى ورکړ.
ننګرهار
د پوهنې آمر، د عامې روغتیا رئیس، د علماوو شورا رئیس او د ننګرهار ولایت د خوګیاڼو ولسوالۍ یو شمېر قومي مشرانو د څارنې د یوه پروګرام په ترڅ کې، د وزیر پتنګ او تورغر لېسو د اداري او تدریسي چارو څخه څارنه وکړه او د یادو بنسټونو د ښوونیزو خدمتونه څخه یې ستاینه وکړه.
همدارنګه:
د ننګرهار ولایت پوهنې ریاست د ساینس او ټکنالوژۍ مرکز د یوه پلاوي په ګمارلو سره، د یاد ولایت د ښوونځیو لابراتوارونه د نویو تجربوي وسایلو او موادو د وېش په موخه وڅېړل.
پکتیا
د پکتيا ولايت پوهنې رئيس مولوي عبدالوکيل خالد، د یاد ولايت ميرزکې ولسوالۍ ته د يوه کاري سفر په ترڅ کې، د دغه ولسوالۍ له اداري مسئولينو او د ښوونځيو له مدېرانو سره وکتل.
دغه راز نوموړي د پوهنې د ستونزو د حل او د پوهنې د وضعيت د لاښه والي په موخه یې د خبرو په ترڅ کې هغوی ته لازمې لارښوونې وکړې.
