له ولایتونو څخه د پوهنې لنډ خبرونه
جوزجان
د جوزجان ولايت پوهنې رئيس الحاج مولوي محمد طاهر جواد، د جنرال حکيم عالي لېسې له اداري او تدريسي چارو ليدنه وکړه او د لېسې له شورا سره يې د یادې لېسې د ترمیم په برخه کې تفصیلي خبرې وکړې.
سرپل
د سرپل ولایت په صیاد ولسوالۍ کې د ښوونکو او څارونکو غړو د ظرفیت لوړولو په موخه، د مدیریت د اصولو او ښوونیزې مېتودولوژۍ تر سرلیک لاندې پنځه ورځنی سیمینار، چې څه موده وړاندې پیل شوی و، د تصدیق پاڼو په وېشلو سره پای ته ورسېد.
هلمند
د هلمند ولايت پوهنې رئيس مولوي محمد عوض انصاري، د یاد ولايت ديشو ولسوالۍ د مدارسو له استادانو او ديني علماوو سره وکتل.
نوموړي په یاده کتنه کې د ديني بنسټونو ستونزې واوريدې او په دې برخه کې يې د همکار د ژمنې ترڅنګ، د مدارسو له مسئولینو وغوښتل، چې خپل ټول ښوونیز فعالیتونه د پوهنې وزارت د کړنلارو او قوانینو په رڼا کې ترسره کړي.
سرپل
د سرپل ولایت د ښوونکو ښارګوټي پلان، چې ډیزاین او نقشه یې تر دې وړاندې د پوهنې وزارت له خوا تصویب شوې وه، د تخنیکي پړاوونو وروسته د ښار جوړونې ریاست او د پوهنې ریاست د انجنیرانو د یوه ټېم له لوري یې د عملي کولو په موخه، کرښې و کښل شوې.
ټاکل شوې ده، چې په یاد ښارګوټي کې د سرپل ولایت ۳۰۱ تنو بې کوره ښوونکو ته د استوګنې لپاره ځمکې ورکړل شي.
لغمان
د لغمان ولایت پوهنې رئیس مولوي شاه جهان ساجد او ورسره مل پلاوي، دیاد ولایت د شفا خصوصي عالي لېسې د زده کوونکو د فراغت په مراسمو کې ګډون وکړ او فارغانو ته یې د مبارکۍ ترڅنګ د ساینس او پوهنې پر ارزښت خبرې وکړې.
د یادو مراسمو په پای کې د لغمان پوهنې ریاست له لوري ممتازو زده کوونکو ته د هغوی د هڅونې په موخه، ډالۍ ورکړل شوې.
