له ولایتونو څخه د پوهنې لنډ خبرونه

 نورستان
د نورستان ولايت پوهنې رئيس مولوي تاج محمد مطمئن، د ښوونيز و چارو د څېړلو په موخه، د ياد ولايت دوآب ولسوالۍ ته  کاري سفر وکړ.

نوموړي د یادې ولسوالۍ د پوهنې له مسئولینو، ښوونځيو له ښوونکو او زده کوونکو سره د کتنې په ترڅ کې، د هغوی ستونزې وڅېړلې او د حل ژمنه یې وکړه.

 هلمند
 د هلمند ولایت پوهنې ریاست اداري غونډه، د ياد ولایت پوهنې رئیس الحاج مولوي محمد عوض انصاري په مشرۍ ترسره شوه.
په ياده غونډه کې، د شهادتنامو د وېش بهیر پر چټکتیا او د املاکو د ستونزو په اړه تفصيلي خبرې وشوې.

 په یوه بل خبر کې:
 د لوړو زده کړو وزارت کانکور آزموینې پلاوي، د هلمند ولایت پوهنې ریاست په همکارۍ د ياد ولایت د مرکز او ولسوالیو د پوهنې آمرينو او مدېرانو لپاره، یو ورځنی روزنیز سیمینار جوړ کړ؛ چې په ترڅ کې يې ګډون والو ته د کانکور آزموینې اخیستلو طریقې او معیارونه ور وښودل شول.
 په پام کې ده، چې په روان کال کې له هلمند ولایت څخه ۱۳۷ تنه نوماندان په کانکور آزموینه کې ګډون وکړي.

 جوزجان
 د جوزجان ولایت پوهنې رئیس الحاج مولوي محمد طاهر جواد، د شبرغان ښار اړوند شهید محمد یوسف اسحاقزي، مولانا اذنب شبرغاني او د بابا علي د هلکانو لېسو اداري او تدریسي چارې له نيږدې وکتلې.

 نوموړي د هغو ليدنو په ترڅ کې چې د ښوونځيو له مسئولينو، ښوونکو او د ښوونځيو شورا له غړو سره يې درلودې، د درسونو د کيفيت د ښه والي او اداري نظم د ټينګښت په اړه خبرې وکړې.

 کابل
  د کابل ښار يوولسمې ناحيې د پوهنې نوی ټاکل شوی آمر، د ياد ښار پوهنې رئيس حافظ عبدالباسط حقاني له لوري د هغه آمريت کارکوونکو ته ور وپېژندل شو.
   د پوهنې رئیس نوي آمر ته د مبارکۍ ویلو ترڅنګ، له همکارانو وغوښتل، چې د ورځنیو چارو په پرمختګ کې ورسره همکاري وکړي.