له ولایتونو څخه د پوهنې لنډ خبرونه
لوګر
د لوګر ولايت د پوهنې رئيس مولوي جنت ګل عزيز په یوه غونډه کې د دغه رياست له آمرینو او مديرانو سره وکتل او د پوهنې د وضعیت د څيړنې په ترڅ کې يې له اړوندو مسوولينو څخه وغوښتل چې د نوي تعلیمي کال د پيل لپاره لازم چمتووالى ونيسي، ترڅو د ښوونې او روزنې په بهیر کې له ستونزه سره مخامخ نه شي.
هرات
د ښوونځيو د املاکو د ساتنې او پالنې ریاست پلاوي او د ښوونځيو د ودانيزو پروژو د څارنې او ارزونې په موخه هرات ولايت ته سفر وکړ.
ټاکل شوې دغه پلاوي د هرات د ښوونځیو د ودانیزو پروژو ارزونه وکړي او پایلې یې د وزارت له مشرتابه سره شریکې کړي.
کاپیسا
د کاپيسا ولايت د نجراب ولسوالۍ د ښوونځيو شپږ تنه مامورین او ۳۷ تنه خدماتي کارکوونکي د دغه ولايت د پوهنې رياست د مشرتابه پلاوي له خوا و ارزول شول.
جوزجان
د جوزجان ولايت د پوهنې رياست چارواکي وايي: د ټولنې د پراختيا او همغږۍ موسسې د دغه ولايت د پوهنې له رياست سره په همغږۍ د دغه ولايت په پنځو ولسواليو کې د سواد زده کړې شاوخوا سل ټولګي جوړ کړي، چې سلګونه کسان پکې د ليک او لوست په زده کړه بوخت دي.
د دغه ولايت د پوهنې رئيس الحاج مولوي محمد طاهر جواد وويل: د جوزجان پوهنې رياست هڅه کوي، چې د دغه ولايت په نورو ولسواليو کې هم ورته ټولګي جوړ کړي، ترڅو د ټولنې ټول وګړي د ليک او لوست له نعمت څخه برخمن شي.
همدارنګه
د جوزجان ولايت د پوهنې رياست د ساینس او تکنالوژۍ تعلیمي مدیریت د دغه ولايت د قرقين او خماب ولسواليو ٣٥ تنو ښوونکو ته د تدريسي لابراتوارونو په برخه کې يو سيمينار جوړ کړ.
د دغه ولايت د پوهنې رئيس مولوي محمد طاهر جواد وويل: د پوهنې رياست رهبري هڅه کوي، چې د يادو ولسواليو په ټولو ښوونځيو کې د زده کوونکو د عملي کار په موخه لابراتواري څانګې فعالې کړي.
