له ولایتونو څخه د پوهنې لنډ خبرونه
جوزجان
په دې وروستیو کې د جوزجان ولایت د یو شمېر ښاري ښوونځیو د آمرینو او مدیرانو لپاره د پوهنې وزارت د پلاوي له خوا د جوزجان ولایت د زده کوونکو د چارو د ریاست د پلان شویو فعالیتونو د پلي کولو د لارښوونو په باب د شبرغان ښار په ګوهرشاد بیګم ښوونځي کې یو درې ورځنی سیمینار جوړ شو.
پکتیکا
په پکتیکا ولایت کې د سویډن، یونیسف موسسې او د سر حوضې ولسوالی د آمریت مسوولینو د دغه ولایت د پوهنې له نوي رئیس الحاج مولوي عبدالقیوم فاروقي سره وکتل.
دوی د پوهنې رئیس ته د مبارکۍ ویلو پرمهال خپل فعالیتونه او کاري پلانونه له نوموړي سره شریک کړل او د یاد ولایت د پوهنې ریاست سره یې د هر ډول مرستو ژمنه وکړه.
سمنګان
د سمنګانو ولایت د مرکز ایبک ښار د کارته خراسان په جامع جومات کې د ۲۵۰ فاضلانو او د قرآن کریم د حافظانو پر سرونو د فضیلت دستارونه کېښودل شول.
په دې غونډه کې د سمنګان ولایت د پوهنې ریاست رهبري پلاوي او د ملکي او نظامي ادارو یو شمېر مسوولینو ګډون کړی و.
د حکومت د اطلاعاتو او رسنیو مرکز مشر مولوي انعام الله سمنګاني په اسلامي ټولنه کې یې د علماوو شتون یوه جدي اړتیا وګڼله او هغوی یې د ټولنې مشالونه وبلله او له هغوی یې وغوښتل چې د ولس او هېواد پر وړاندې خپل مسوولیت په ښه شکل ادا کړي.
هرات
د پوهنې وزارت د خصوصي زده کړو رئيس الحاج عبدالرحمن حميدي او ورسره پلاوي د هرات ولايت د پوهنې له مسوولينو سره د ليدنې پر مهال د دغه ولايت د خصوصي ښوونيزو بنسټونو او ښوونيزو کورسونو له مسوولينو څخه وغوښتل، چې خپل پروګرامونه او فعاليتونه د پوهنې وزارت د اصولو په رڼا کې په سمه توګه ترسره کړي.
