له ولایتونو څخه د پوهنې لنډ خبرونه
کندز
د اکتید ښوونیزې موسسې په مرسته د اصحاب الصفه د یتیم خانې له ۲۰۰ څخه زیاتو زده کوونکو ته کتابچې ووېشل شوې.
د کندز د پوهنې ریاست د عمومي زده کړو آمر قاري رحیم ګل احمدي له پوهنې سره د مرستندویو بنسټونو له مرستو څخه مننه وکړه او د دوی د لا زیاتو مرستو هیله یې وکړه.
دایکندي
د دايکنډي ولايت د پوهنې رياست د سيمه ييزو ارګانونو د نظامي او ملکي ادارو د مسوولينو په حضور کې د هغو ٤٣ ښوونکو د خدمتونو د ستاينې په موخه غونډه وکړه چې د پوهنې وزارت له خوا ستاينليکونه ورکړل شوي وو.
ګډونوالو د علم او پوهې په ارزښت او په ټولنه کې د استاد پر مقام خبرې وکړې او ممتازو استادانو ته یې مبارکي وویله.
پکتیکا
په پکتیکا ولایت کې د یونسکو ادارې په ملاتړ د سواد زده کړې د ټولګیو د ۱۱۷ تنو ښوونکو لپاره ۷ ورځنی ښوونیز سیمینار پای ته ورسید.
د دغه ولایت د پوهنې رئیس الحاج مولوي میرزا علي خان سعید د دغه سیمینار له تنظیموونکو څخه د مننې ترڅنګ له ګډونوالو وغوښتل، چې د سیمینار له علمي محتوا څخه ګټه پورته کړي.
جوزجان
د جوزجان د پوهنې رياست مسوولين وايي: د اکتید موسسې په مالي مرسته د دغه ولايت د منګجیک ولسوالۍ د ٢٢ ښوونځيو ښوونکو ته اته ورځنى ښوونيز سيمينار په لاره واچول شو.
د جوزجان ولايت د پوهنې رئيس مولوي محمد طاهر جواد وويل، چې د دغه ښوونيز پروګرام له جوړېدو څخه يې موخه د تدريس د مېتودونو او د ارواپوهنې په برخه کې د ښوونکو د ظرفيتونو لوړول دي.
ننګرهار
د پسرلي موسم په رارسېدو او د نوي ښوونیز کال د پیل په مناسبت د جلال اباد ښار د الایي لیسې یو شمېر زده کوونکو د خپل ښوونځي د انګړ د ښکلا په موخه د یادې لېسې ادارې ته یو شمېر زینتي بوټي او ګلدانونه ډالۍ کړې.
