له ولایتونو څخه د پوهنې د کړنو په اړه راپورونه

بادغیس

د کانکور ملي ادارې د بادغیس ولایت پوهنې ریاست سره په همغږۍ د يادې ادارې د آمرانو او کارکوونکو لپاره یو ورځنی سیمینار جوړ کړ.
په ياد سيمينار کې د کانکور آزموینې د اخیستلو طریقې، له آزموینو سره د چلند او یو شمېر نورو مهمو مسایلو په اړه معلومات ورکړل شول.
ټاکل شوې ده ، چې په ياد ولايت کې کانکور آزموینه، د روان لمريز کال د زمري مياشتې په ١٢ او ١٣ نېټو واخيستل شي.

کابل

د کابل ولایت پوهنې ریاست کې، د پوهنې وزارت د اسلامي زده کړو د معینیت له لوري يو ورځنی سيمينار جوړ شو.
په ياد سيمينار کې، کارپوهانو او آمرينو ته، د اسلامي زده کړو د څانګو لپاره د سل زره نويو بستونو د تطبيق په تړاو  ښوونيزې لارې چارې ور وښودل شوې.

ننګرهار

د ننګرهار ولايت پوهنې رئيس مفتي حبيب حضرت حقاني، د يادې ادارې د کارکوونکو له اداري فعاليتونو څخه څارنه وکړه او له يو شمېر مراجعينو سره يې د کتنې په ترڅ کې د مسئولينو د کړنو او چلند په اړه پوښتنې مطرح کړې.
په پايله کې مراجعينو له اړوندو کارکوونکو څخه خپل رضايت څرګند کړ. 

 
د يو خبر له مخې

د ننګرهار ولایت پوهنې ریاست  له لوري، د مرکز او ولسوالیو د ښوونځیو د دولسمو ټولګیو فارغانو څخه د کانکور آزمويشي آزموینه واخیستل شوه.
د يادې آزموينې د اخيستلو موخه، په راتلونکو کې د کانکور له آزموينې سره د زده کوونکو بلدتيا ښودل شوې ده.

پنجشېر

دپنجشېر ولايت دپوهنې رياست اداري غونډه، د ياد ولايت د پوهنې رئيس مولوي غلام ايشان حماس په مشرۍ،  د مرکز او ولسواليو له کارکوونکو سره جوړه شوه.
 د ياد ولايت پوهنې رئیس د یو شمېر اړینو مسایلو په اړه د خبرو تر څنګ، د رسمي چارو د پرمختګ په برخه کې د کارکوونکو پر تفاهم او همغږۍ ټینګار وکړ.