له ولایتونو څخه د پوهنې د کړنو لنډیز
جوزجان
د جوزجان ولایت پوهنې رئیس مولوي محمد طاهر جواد د ياد ولایت د پوهنې ریاست له یو شمېر انجنیرانو سره د درزاب ولسوالۍ د ښوونځیو د بیارغونې له چارو څخه څارنه وکړه.
ننګرهار
د ننګرهار ولایت پوهنې ریاست رهبري پلاوي د یوه وېډیو کنفرانس په ترڅ کې د پوهنې وزارت له مشرتابه سره د ياد ریاست د نوي تشکیل د تطبيق، د شته امکاناتو او ننګونو په اړه مشورې او نظرونه تبادله کړل.
د وزارت رهبري له دغه ریاست سره د ستونزو په حل کې د همکارۍ له ژمنې وروسته د نوي تشکيل د پروسې پر چټکتیا ټینګار وکړ.
نورستان
د پوهنې وزارت د کیفیت تضمين معينيت د څارنې او ارزونې ریاست نورستان ولایت ته يو پلاوی لېږلی، تر څو د ياد ولايت په مرکز او ولسوالیو کې د پوهنې ریاست اداري او تدریسي فعالیتونه و ارزوي او پایلې يې د پوهنې وزارت له مشرتابه سره شريکې کړي.
پکتيکا
د پکتیکا ولایت د پوهنې رئیس الحاج مولوي عبدالقیوم فاروقي د یو لړ شانداره مراسمو په ترڅ کې د دغه ولایت د سرحوض ولسوالۍ د پوهنې نوی آمر د یادې ولسوالۍ د پوهنې آمريت کارکوونکو ته ور معرفي او رسماً یې په کار پیل وکړ.
د پوهنې رئيس نوموړي ته د مبارکۍ ترڅنګ له هغه وغوښتل، چې د پوهنې د چارو د لا ښه والي لپاره هلې ځلې وکړي.
