له ولایتونو څخه د پوهنې د فعالیتونو لنډ خبرونه
- بلخ
د بلخ ولايت د پوهنې ريس الحاج مولوي عبدالجليل شهیدخېل د پوهنې وزارت له لوري د نغدي مرستو د وېش په موخه د دغه ولايت کلدار ولسوالۍ ته لاړ. د دغو مرستو د وېش پر مهال يې د مدارسو او دارالحفاظونو له تدريسي او اداري چارو څخه ليدنه وکړه. په ياده ولسوالۍ کې يې د پوهنې د کيفيت پر ښه والي او په مدارسو کې یې پر ښه تدريس ټينګار وکړ.
- غزني
د غزني ولایت د قره باغ ولسوالۍ د قلعه عطار اوسېدونکي محمد اسماعیل محبت خېل د دغه ولایت د پوهنې ریاست ته یې په خپل لاس لیکل شوي د قران کریم یوه نسخه ډالۍ کړه.
د غزني ولایت د پوهنې ریس مولوي محمد منیر منصور د دغه نیک اقدام ستاینه وکړه او مننه یې ترې وکړه.
- خوست
د NRC د انجینرۍ ټیم او د خوست ولایت د پوهنې ریاست له مسوولینو څخه ګډ پلاوي د دغه ولایت په بېلابېلو ولسوالیو کې د ۱۲ ښوونځیو د بیارغونې له چارو څخه لیدنه وکړه او د دغه پروګرام له مسوولینو څخه یې وغوښتل چې چارې په معیاري ډول او د قرارداد سره سم پرمخ یوسي.
- بادغیس:
د بادغیس ولایت د پوهنې ریاست مسوولینو ۲۸ ژمني کوټونه او ۲۸ جوړې بوټان وپېرل او د دغه ولایت د یتیم خانو پر زده کوونکو باندې د دغه ریاست د څارنې د آمر مولوي حیات الله حقیر له خوا ووېشل شول.
- کاپیسا:
د یونیسف ادارې د کاپیسا ولایت د پوهنې ریاست سره په همغږۍ د دغه ولایت د اله سای ولسوالۍ د ۶۰ ښوونځیو ښوونکو ته د ظرفیت لوړونې روزنیز سیمینار جوړ کړ. چې موخه یې په دغه ولایت کې په اداري او تدریسي چارو کې د پوهنې د مسوولینو د علمي سویې لوړول دي.
