له ولایتونو څخه د پوهنې خبرونه
تخار
د تخار ولایت د پوهنې ریاست مشرتابه، د ولایت مقام او د امر باالمعروف استازي په ګډه د تالقانو ښار د مرکزي دارالعلوم له اداري او تدریسي چارو څخه څارنه وکړه.
په دې کتنه کې یې د دارالعلوم ستونزې او اړتياوې وڅېړلې.
د تخار ولایت د پوهنې رئیس الحاج مولوي حزب الله مبشر د دیني مدارسو او دارالعلومونو وده او پیاوړتیا یې د پوهنې وزارت له پلانونو څخه وګڼله او ژمنه یې وکړه چې د ستونزو او وړاندیزونو د حل په برخه کې به ورسره مرسته وکړي.
نورستان
د نورستان ولایت د پوهنې رئیس مولوي تاج محمد مطمئن د دې ولایت له والي شیخ شېراحمد حقاني سره وکتل.
نوموړي د پوهنې ریاست د لاسته راوړنو، فعالیتونو، راتلونکو پرمختیایي پلانونو او ستونزو په باب ورسره خبرې وکړې.
د نورستان والي د پوهنې په برخه کې د هر ډول مرستو ژمنه ورکړه.
پروان
د پروان ولایت د پوهنې رئیس مفتي محمد حسن حقاني د سیدخېلو ولسوالۍ د پوهنې له آمریت، د امام اعظم (رح) له لېسې څخه لیدنه وکړه.
د پروان ولايت د پوهنې رئيس د دې ښوونیزو بنسټونو د اداري او تدريسي اسنادو د کتنې پر مهال له مسئولينو وغوښتل، چې د زده کوونکو ښوونې او روزنې ته جدي پاملرنه وکړي.
