له ولایتونو څخه د پوهنې خبرونه
ارزګان
د SHAO مؤسسې سیمه ییز دفتر د ارزګان ولایت د پوهنې ریاست سره په همغږۍ تر خپل کنترول لاندې د سیمه ییزو او چټکو زده کړو د ټولګیو د ښوونکو لپاره د ظرفیت لوړونې سیمینار جوړ کړ.
د ارزګان ولايت د پوهنې ریاست سرپرست مولوي محمدطيب مرحبا له دې روزنيز پروګرام څخه ليدنه وکړه او له ګډونوالو يې وغوښتل چې له سيمينار څخه اعظمي ګټه پورته کړي.
د يادې مؤسسې د استازي په وينا، د اروزګان ولایت په مرکز او ولسواليو کې د دوى تر ملاتړ لاندې شاوخوا ٢٠٠ سيمه ييزې ټولګي فعاليت لري، چې سلګونو کسانو ته يې د زده کړو زمينه برابره کړې ده.
بلخ
په بلخ ولایت کې د یونیسف سیمه ییز دفتر د دې ولایت د شولګرې ولسوالۍ په یو شمېر ښوونځیو کې ښوونکو او زده کوونکو ته درسي کتابونه، قرطاسیه او ښوونېزې بستې ووېشلې.
د بلخ ولایت د دولت آباد ولسوالۍ د پوهنې آمریت د ښوونځیو له آمرینو او مدیرانو سره د کاري ناستې په ترڅ کې د درسي کتابونو او قرطاسیو د وېش لړۍ پای ته ورسوله او له هغوی یې وغوښتل چې د درسي کتابونو د ساتنې او کار اخیستنې په باب زده کوونکو ته معلومات ورکړي.
همدارنګه د بلخ ولایت د پوهنې رياست د املاکو عمومي مدير د دغه ولايت چمتال ولسوالۍ ته لاړ او د یادې ولسوالۍ د پوهنې آمریت د مهمو املاکي کتابونو او اسنادونو ارزونه یې وکړه. او په دې برخه کې یې مسئولینو ته د شته نیمګړتیاوو په اړه لازمې لارښوونې وکړې.
