له مرکز او ولایتونو څخه د پوهنې لنډ خبرونه
بلخ
د بلخ ولايت د ښوونې او روزنې آمریت مياشتنۍ غونډه د يادې څانګې د آمر تر څارنې لاندې جوړه شوه، چې په دې غونډه کې د فارغانو د نتايجو او شهادتنامو، د ارتقایي ازموينو، د کانکور د ازموينو د فورمونو د وېش او د رتبو د تاييد او د راستنیدونکو زده کوونکو او همدارنګه د مرکز ساینس د ستونزو د حل په موخه لازمې پرېکړې وشوې.
پروان
د پوهنې وزارت د اسلامي زده کړو معینیت د دارالعلومونو رئیس مولوي عبدالقدوس قدوسي او ورسره مل پلاوي د پروان ولایت د پوهنې له ریاست څخه لیدنه وکړه.
نوموړي د دغه ولايت د پوهنې رياست له مشرتابه څخه د مننې پرمهال د پوهنې له مسوولينو او کارکوونکو وغوښتل، چې د دغه ولايت د ښوونې او روزنې د وضعيت د ښه والي په موخه جدي هڅې وکړي.
کابل
د کابل ولایت د استالف ولسوالۍ د پوهنې آمریت مسوولینو د ۱۴۰۱ کال د نمایشي درسونو د راټولولو په برخه کې د سواد زده کړې د مدیریت د فعالیتونو، ورځنیو چارو ته د لا ښه لاسرسي او د چارو د ښه ترسره کولو په اړه غونډه وکړه.
کابل
د ماشومانو د ساتنې موسسې سیمه ییزو کارکوونکو د کابل ولایت د خاک جبار ولسوالۍ د پوهنې له آمر مولوي صلاح الدین ایوبي سره وکتل او د خپلو فعالیتونو او کاري پلانونو په اړه یې ورته معلومات ورکړل.
د يادې ولسوالۍ د پوهنې آمر د يادې موسسې د کړنو د ستاينې ترڅنګ د يادې ولسوالۍ د پوهنې ستونزې یې له هغوى سره شريکې کړې او په دې برخه کې يې د مرستو غوښتنه وکړه.
کابل
د کابل ولایت د استالف ولسوالۍ د پوهنې آمریت مسوولین وايي: د ښوونیزو فعالیتونو د څارنې په ترڅ کې یې یو شمېر هغه خصوصي کورسونه چې له جواز پرته یې د پوهنې وزارت د طرزالعملونو خلاف فعالیت کاوه وتړلې او د دغو بنسټونو له مسوولینو یې غوښتي دي، چې د جواز د ترلاسه کولو وروسته خپل فعالیتونه د قانون په رڼا کې بیرته پیل کړي.
