فراه ولایت کې ښوونکي په نقدي او معنوي ډالیو وستایل شول
پوهنې وزارت، فراه: فراه ولایت کې د شپې ليسې ښوونکي چې په افتخاري توګه له هر ډول امتياز پرته د يادې لیسې زده کوونکو ته درس ورکوي، د دوی د ښو کړنو او همکارۍ په پار د یاد ولایت د پوهنې ریاست له لوري په نقدي ډالیو او ستاینليکونو وستایل شول، دا په داسې حال کې ده، چې د فراه د پوهنې ریاست د ښوونکو له کمښت سره مخ دی او د يادې ستونزې د حل په موخه یې دا افتخاري ښوونکي جذب کړي دي.
په هغه غونډه کې چې د یادو ښوونکو د هڅونې په موخه جوړه شوې وه د پوهنې ریاست مشرتابه او د يادې لیسې ښوونکو او مدیره هیئت ګډون درلود.
د غونډې په پیل کې د ښوونکو په استازولۍ مولوي نورالدين خبرې وکړې او وې ويل: ښوونکی د هغې ډیوې په څیر دی چې خپله سوځي خو ټولنې ته رڼا وربخښي او د نوي نسل په روزنه کې هلې ځلې کوي، ښوونکی د ښوونیز نظام د ملا شمزۍ ګڼل کیږي.
همداراز نوموړي د پوهنې د مشرتابه کړنې او هلې ځلې وستایلې او د وزارت له رهبرۍ څخه یې وغوښتل څو د ښوونکو ستونزو ته جدي پاملرنه وکړي.
د پوهنې رئيس استاد وحیدالله شیراني، زده کړیيز بهیر کې د ښوونکو هلې ځلې وستايلې، هغوی یې د ټولنې رښتیني خادمین وبلل او زیاته یې کړه: زه د هغو ښوونکو منندوی یم چې له هر ډول امتیاز پرته یې اته میاشتې زده کړییز بهیر جاري ساتلی او د هیواد بچیو ته یې خدمت کړی.
پاتې دې نه وي، چې تیارې شوې ډالۍ د یاد ښوونځي ۲۷ تنه نارینه او ښځینه ښوونکو ته ورکړل شوې.
