فاریاب ولایت کې د ۱۶ مېلیونه افغانیو څخه په زیات لګښت، د یو باب ښوونځي ودانۍ پرانیستل شوه
د فاریاب ولایت دولت آباد ولسوالۍ اړوند د جوقها لومړني ښوونځي نوې ودانۍ، چې د جوړولو پروژه یې څه موده وړاندې د یوې همکارې ادارې په ملاتړ، د ۱۶.۸ مېلیونه افغانیو په لګښت پیل شوې وه، اوسمهال بشپړه او د ولایتي پوهنې چارواکو او مسئولینو په ګډون د یو لړ مراسمو په ترڅ کې پرانیستل شوه.
د فاریاب ولایت پوهنې رئیس محترم الحاج مولوي حمیدالله ارشاد په خپله وینا کې د یاد ښوونځي ودانۍ جوړول د پوهنې د پراختیا او متوازن پرمختګ، د ښوونیز او روزنیز کیفیت لوړولو او د زدهکوونکو لپاره د خوندي تعلیمي چاپېریال رامنځته کولو کې یو مهم ګام وباله.
نوموړي زیاته کړه: "د دې ودانۍ په جوړولو سره، په سیمه کې د زدهکوونکو د تعلیمي ستونزو لویه برخه حل او دوی ته د زده کړې لپاره مناسب چاپېریال چمتو شو."
د همدغه ښوونځي چارواکو ټینګار وکړ چې د ښوونځي د نوې ودانۍ ساتنې او پالنې ته به جدي پاملرنه کوي.
د یادولو ده چې پورته ذکر شوې ودانۍ ۸ درسي خونې، یوه اداري څانګه، یوه لابراتوار خونه، یوه محافظتي خونه لري، چې پکې د ښاري برېښنا بشپړونکی سیسټم، احاطوي دېوال، د څښاک باکو اوبو لپاره یو حلقه څاه، د اور وژنې تجهیزات، ۷ غرفې تشنابونه، د زدهکوونکو لپاره ۱۴۴ پایې مېزونه - څوکۍ او نور اړین تجهیزات شامل دي.
د پوهنې وزارت مشرتابه د ټولو همکارو ادارو له ملاتړ څخه مننه او قدرداني کوي.
