فاریاب ولایت کې د یو باب لومړني ښوونځي ودانۍ پرانیستل شوه
د فاریاب ولایت المار ولسوالۍ اړوند د ایتی اوروق لومړني ښوونځي نوې ودانۍ، د پوهنې چارواکو، علماءکرامو، د سیمه ییزو ادارو مسئولینو او د خلکو استازو په حضور کې افتتاح او ګټې اخیستنې ته وسپارل شوه.
د پرانیستې په مراسمو کې د فاریاب ولایت پوهنې رئیس محترم الحاج مولوي حمیدالله ارشاد د ښوونځي ودانۍ جوړول د تعلیمي وضعیت ښه والي او د زدهکوونکو لپاره د مناسب تعلیمي چاپېریال رامنځته کولو لپاره یو مهم ګام وباله.
نوموړي د ښوونځي له چارواکو او زدهکوونکو وغوښتل چې د ودانۍ ساتنې او پالنې ته جدي پاملرنه وکړي.
ورپسې د نورو سیمه ییزو ادارو مسئولینو هم په دې موضوع خپلې ویناوې وکړې.
د ایتی اوروق کلي د اوسېدونکو په استازیتوب یو قومي مشر هم د موضوع په اړه خبرې وکړې؛ د پوهنې وزارت او د ولایتي رهبرۍ له هڅو څخه یې مننه او قدرداني وکړه.
د پوهنې چارواکو په وینا، د ښوونځی دغه ودانۍ ۱۳ درسي ټولګي، یوه اداري خونه او نور اړین ملحقات لري، چې ټولټال ۲۲ مېلیونه افغانۍ لګښت پرې راغلی او په پایله کې یې سلګونو زدهکوونکو ته د زدهکړې مناسب چاپېریال رامنځته شو.
