د کنړ په اسمارو ولسوالۍ کې یوه ښوونځي ته نوې ودانۍ جوړه شوه
د پوهنې وزارت_کنړ: د کنړ د اسمار ولسوالۍ د هلکانو د مرکزي لېسې نوي ودانۍ د یو لړ مراسمو په ترڅ کې د کنړ والي محمد اقبال سعید، د پوهنې رییس مجیب الرحمن همدرد لخوا په داسي حال کې چې ولایتي شورا رئیس، د دولتی ادارو یو شمیر مسوولینو، قومي مشرانو، ښوونکو اوزده کوونکو ګډون درلود د پټی په پریکولو سره ګټې اخیستنې ته وسپارل شوه.
د کنړ والي محمد اقبال سعید د یادې ودانۍ د پرانیستلو په غونډه کې وویل: پوهنه د هېوادونو او ټولنو د پرمختګونو بنسټ دی او خوښ دی، چې نن د یوداسې مرکز پرانیسته کوي، چې پرمټ به د جهل تیارې ختمې او ټولنې ته به رڼاګانې وړاندې کړي.
هغه د لېسې ودانۍ د بشپړیدو له امله د اسمار ولسوالۍ مشرانو، د زده کوونکو او والدینو ته د مبارکۍ ویلو ترڅنګ د قومي مشرانو، پوهنې آمریت له استازو، ښوونکو او زده کوونکو وغوښتل، چې د ودانۍ او تجهیزاتو ساتنې ته جدي پاملرنه وکړي.
همدارنګه د پوهنې رییس د یادې ودانۍ له پرانېستو خوښي وښوده او ډاډ یې ورکړ، چې په دې ولایت کې به د پوهنې د ودې او پیاوړتیا لپاره جدي هلې ځلې وکړي.
د پوهنې د رییس په وینا دغه ودانۍ په پاخه او اساسي ډول په دریو پوړنو کې د افغان حکومت د ملي بودیجې له لارې د ۱۹،۸ میلیونه افغانیو په لګښت د دوو کلونو په موده کې جوړه شوي ، چې ۲۴ درسي ټولګي، کمپیوټر لېب، لابراتوار، د اوبو څاه، احاطوي دیوال، د زده کوونکو لپاره میز او چوکۍ او نور اړیني آسانتیاوي لري. چې د یادې ودانۍ له پرانېستو سره د اسمارو ولسوالۍ سلګونه زده کوونکو ته د زده کړو خوندي درسي چاپیریال برابر شوي دې .
