د کندهار د پوهنې له ریاست څخه لنډ خبرونه
کندهار
د کندهار ولایت د نیش ولسوالۍ د پوهنې او د تعلیمي څارنې آمرین د دې آمریت اړوند د دریو دیني مدارسو اداري او تدریسي چارې وڅېړلې او د یادې ولسوالۍ د مدارسو له مدیرانو او قومي مشرانو سره یې د یادې ستونزې په اړه مشورې وکړې. د یادو ادارو د فعالیتونو د ښه والی په موخه یې لازمې لارښوونې وکړې.
د نورو خبرونو له مخې:
د کندهار د پوهنې رياست د ښووني او روزني آمر او ورسره مل پلاوي د دغه ولايت د سپين بولدک ولسوالۍ د ديني مدارسو د ښوونکو په غونډه کې ګډون وکړ او خلک یې پوهنې ته وهڅول.
همدارنګه:
د پوهنې وزارت د څېړنې کمېټې پلاوي کندهار ولایت ته په یوه کاري سفر کې د سپین بولدک ولسوالۍ د پوهنې آمریت د اداري او تدریسي فعالیتونو د ارزونې په ترڅ کې د یادې ولسوالۍ د پوهنې او د تعلیمي څارنې له آمرینو سره وکتلې او د هغوی احصایوي او اداري راپورونه یې وڅېړلې.
په نورو خبرونو کې:
د کندهار ولايت په ډنډ ولسوالۍ کې د سواد زده کړې له ټولګيو څخه ۷۲ تنه زده کوونکي فارغ شول.
د دې ولایت د پوهنې ریاست مسوولینو فارغانو ته د مبارکۍ ویلو پرمهال هغوی وهڅول چې د علم او پوهې په برخه کې لا زیات زحمتونه وباسي.
همدا شان:
د کندهار ولایت د کوتل مرچه لېسې د څلور نیم میاشتنیو ازموینو پایلې د یوې غونډې په ترڅ کې د لېسې د مدیرانو، ښوونکو، زده کوونکو او د هغوی د کورنیو د غړو په ګډون اعلان شوې. په دې غونډه کې ممتازو محصلینو ته جایزې او استادانو ته یې ستاینلیکونه ورکړل شول.
