د کابل ښار د یو شمېر ښوونځیو سپورټي لوبډلو ترمنځ سیالۍ ترسره شوې

د افغانستان، ا.ا. دبري او فتحې درېيمې کليزې په مناسبت، نن د پوهنې وزارت د اساسي او ثانوي زده کړو رياست له خوا او د کابل ښار پوهنې رياست په همکارۍ، د ۳۵ لېسو اړوندو سپورټي لوبډلو ترمنځ د ۵۰۰۰ متره په واټن (د دارالامان ماڼۍ څخه تر حبیبیې لېسې پورې) د منډې جوړولو سیالۍ ترسره شوې.
د پوهنې وزارت د اساسي او ثانوي زده کړو رياست د بدني روزنې آمريت مسئولينو د معلوماتو له مخې، يادې سيالۍ د یو ځانګړي پلاوي تر څارنې لاندې په لاره اچول شوې وې، چې په پايله کې يې د عبدالعلي مستغني لېسې لومړى، غازي لېسې دويم او نادریه لېسې درېيم مقامونه ترلاسه کړل.
 همدارنګه د ذبيح الله شهید او سیدنورمحمد شاه مېنې لېسو په ترتیب سره څلورم او پینځم مقامونه خپل کړل.
د سیالیو په پای کې د مسئولینو له لوري ګټونکو لوبډولو ته سپورټي کپونه او ستاینلیکونه ورکړل شول.