د کابل ښار اړوندو ښوونځیو سپورټي لوبډلو ترمنځ د فوټبال سیالیو پایلې اعلان شوې
د کابل ښار د ۳۳ ښوونځیو د سپورټي لوبډلو ترمنځ د فوټبال سیالۍ چې د روان لمریز کال د غبرګولي میاشتې په ۲۱ مه نېټه د پوهنې وزارت د اساسي او ثانوي زده کړو ریاست له خوا د حبیبیې لېسې په لوبغالي کې پیل شوې وې؛ نن د ګټونکې لوبډلې او نایب لوبډلو په اعلانولو سره پای ته ورسېدې.
د یادو سیالیو د پای په مراسمو کې د پوهنې وزارت د اساسي او ثانوي زده کړو رئیس مولوي محمد رحيم ايوب، مسئولينو، د ښوونیزو ناحیو یو شمېر آمرینو، ښوونکو، زده کوونکو او لوبغاړو ګډون درلود.
د دغو سیالیو په پایله کې د اماني لېسې فوټبال لوبډلې لومړی مقام، د حبیبیې او عبدالقادر بیدل لېسو د فوټبال لوبډلو په ترتیب سره دویم او درېیم مقامونه خپل کړل؛ چې د پوهنې وزارت د اساسي او ثانوي زده کړو رياست د مشرتابه له خوا د سياليو ګټونکو لوبډلو ته کپونه او سپورټي لباسونه ډالۍ شول.
