د څه د پاسه ۱.۳ مېلیونه افغانیو په لګښت، کابل ښار اړوند یو باب ښوونځي کې ۶ درسي خونې ورغول شوې
د کابل ښار په اوومه ناحیه کې د محمد فاروق منځني ښوونځي لپاره د درسي ټولګيو جوړولو پروژه، چې څه موده وړاندې د پوهنې د یوې همکارې ادارې له لوري د یو مېلیون ۳۰۵ زره ۵۰۰ افغانیو په لګښت پیل شوې وه، بشپړه او د کابل ښار پوهنې مسئولینو، آمرینو، د دغه ښوونځي د استاذانو او د سیمې د خلکو د استازو په حضور کې پرانیستل شوه. د کابل ښار پوهنې مسئولينو د څرګندونو له مخې: په دې پروژه کې ۶ درسي ټولګي، پینځه تشنابونه او د څښاک د پاکو اوبو يو حلقه څاه شامله ده، چې له امله يې د زده کوونکو د ښوونیز چاپېریال په برخه کې ستونزې هوارې شوې. د یاد ښوونځي منسوبینو او زده کوونکو هم د دې ودانۍ له جوړېدو خوښي څرګنده او د هېواد بچیانو لپاره د زده کړې د چاپېريال په برخه کې يې د پوهنې وزارت له فعاليتونو ستاينه وکړه. د یادولو وړ ده، چې د پوهنې وزارت مشرتابه له ښوونیز نظام سره د خلکو له مادي او معنوي همکاریو ستاینه کوي.
