د ځينو ولایتونو له پوهنې ډګره د خبرونو لنډيز
نیمروز، ارزګان او لوګر:
د پوهنې وزارت د ساینس مرکز ریاست پلاوی نیمروز، ارزګان او لوګر ولایتونو ته په رسمي سفر تللی او د یادو ولایتونو د پوهنې له رئیسانو او مشرانو سره یې د لیدنې پر مهال، په مهمو علمي او تجربوي مسایلو خبرې کړې دي.
پلاوي د يادو ولايتونو په ښوونځيو کې د ساينسي مضمونونو د ښوونکو د وړتیاوو لوړولو په موخه، يو ښوونيز سيمينار هم جوړ کړ او ګډون والو ته يې د تخنيکي وسايلو او لابراتواري توکو د کارولو په تړاو اړینې لارښوونې وکړې.
هلمند
د افغانستان.ا.ا د عالي مقام د فرمانونو او حکمونو د پلي کولو په موخه، د دیني مدارسو د بستونو د وېش په برخه کې د هلمند ولایت د پوهنې ریاست د مسئولینو او دیني علماوو په ګډون غونډه جوړه شوه.
په یاده غونډه کې د پوهنې رئیس الحاج مولوي محمدعوض انصاري وويل: په دې برخه کې يوه کميټه جوړه شوې ده، تر څو د هلمند ولایت د پوهنې ریاست اړوند اداراتو کې د صادر شويو فرمانونو او حکمونو له پلي کېدو څخه څارنه وکړي.
ننګرهار
د ننګرهار ولایت یو شمېر د پوهنې دوستو شخصیتونو په خپل شخصي لګښت، د مومند درې ولسوالۍ اړوند د بیله لېسې د لمریزې برېښنا سیستم فعال او د هسکې مېنې ولسوالۍ د مظهر العلوم مدرسې لپاره یې تخنیکي وسایل وپېرل.
