د پوهنې وزارت مشرتابه د هېواد په یو شمېر ولایتونو کې د ط.الب العلمانو آزموینې بهیر څخه څارنه وکړه
د پوهنې وزارت د اسلامي زده کړو معین الحاج مولوي کرامت الله «آخندزاده» د یو لړ رسمي چارو ترسره کولو او د دیني مدارسو د ثانويه او مافوق ثانویه مرحلو د ط.الب العلمانو د آزموینو بهیر څارنې په موخه نن کونړ ولایت ته ورسېد.
د اسلامي زده کړو معین په پیل کې د یاد ولایت د والي له مرستیال، پوهنې رئیس او یو شمېر کلیدي ځانګو آمرینو سره بحث او خبرې اترې وکړې، ورپسې نوموړی د ثانویه او مافوق ثانویه مرحلو آزموینو ځای ته ولاړ او د یادو آزموینو لړۍ یې له نږدې څخه وکتله.
دغه راز؛ نن د پوهنې وزارت د کیفیت تضمین معین الحاج مولوي عبدالخالق صادق د همدغو آزموینو څخه د څارنې لپاره پکتیکا ولایت ته ولاړ او په یاد ولایت کې یې د دیني مدارسو د ثانویه او مافوق ثانویه مرحلو د آزموینو بهیر څخه له نږدې څارنه وکړه.
د پوهنې وزارت معینانو په دې کتنو کې له مسئولينو وغوښتل، چې د آزموينې روڼتیا او عدالت په جدي ډول مراعات کړئ او د هغو پر نظم او ډسپلین یې ټینګار وکړ.
همدارنګه د یاد وزارت د مقام د دفتر لوی رئیس الحاج مولوي شهاب الدین ثاقب جوزجان ولایت ته د خپل رسمي سفر په ترڅ کې د مدارسو آزموینې وڅارلې او د هغوی د بشپړ نظم په تړاو یې مسئولینو ته اړینې سپارښتنې وکړې.
د پوهنې وزارت یو شمېر مرکزي رئیسانو هم د هېواد په ولایتونو کې د ثانویه او مافوق ثانویه آزموینو بهیر له نږدې وڅاره او د دغو آزموینو د روڼتیا د تامین په موخه یې مسئولینو او لوړ پوړو څارونکو ته اړین هدایات وکړل.
د يادونې وړ ده، چې نن د څلورمې ورځې لپاره د مدارسو «د ثانویه اومافوق ثانویه مرحلو آزموینې» په ټول هېواد کې په بشپړه بریا سره پلې او دغه لړۍ به تر راتلونکې پنجشنبې ورځې دوام ولري.
