د پوهنې وزارت محترم سرپرست د ولایتونو له پوهنې رئیسانو سره د "بریډ" سیسټم د ګټو په اړه آنلاین کنفرانس دایر کړ
د پوهنې وزارت سرپرست محترم الحاج مولوي حبیب الله آغا، په داسې حال کې چې د یاد وزارت یو شمېر مرکزي رئیسان هم حاضر وو، په یاد وزارت کې د "بریډ" سیسټم له جوړولو ستاینه وکړه او د مراجعینو او پوهنې مسئولینو لپاره یې د لاډېرو آسانتیاوو برابرولو لپاره د یاد سیسټم کارول خورا اغېزناک او مهم وبلل.
په پیل کې د پوهنې وزارت محترم سرپرست وویل: موږ او تاسو یو لوی مسئولیت په غاړه اخیستی، چې پر بنسټ یې دنده لرو، تر څو د افغانستان.ا.ا. د مشرتابه عالي مقام د اوامرو او فرمانونو له مخې، خپلې دندې ترسره او د هېوادبچیانو ته د ټولو امکاناتو په کارولو سره اړین او معیاري ښوونیز او روزنیز چوپړونه تقدیم کړو.
د مسئولینو په وینا، د دغه سیسټم له جوړولو اساسي موخه، د مراجعینو لپاره د اړینو آسانتیاوو رامنځته کول او د هغوی له سرګردانیو څخه مخنیوی دی او یاد سیسټم په نړۍوال انټرنټي سیسټم پورې تړلی نه دی او د پوهنې د ټولو څانګو او ادارو سره دوامداره اړیکه لري.
هغوی زیاته کړه: پخوا موږ کولی شوی چې یوازې د کمپیوټر په حافظه کې اسناد د دوو یا درېیو کلونو لپاره وساتو؛ مګر د "بریډ" سیسټم په کارولو سره، موږ کولی شو د شلو کلونو وروسته هم د یاد وزارت له خوا خپرو شويو اسنادو ته بشپړ لاسرسی ولرو، له همدې امله د پورته ذکر شوي سیسټم کارول زموږ لپاره خورا مهم او ګټور دي.
د یادونې وړ ده چې دغه سیسټم، د منسوبینو او مراجعینو لپاره د دوی د اسنادو طی مراحل کولو لپاره د نورو آسانتیاوو سربېره، د مراجعینو ستونزې په چټکۍ او پرته له وخت ضایع کېدلو حل کوي او د روڼتیا او د اسنادو محرمیت ساتلو کې هم خورا مهم نقش لري.
