د پوهنې وزارت مالي او بودیجې کمېټې د یو شمېر ولایتونو له پوهنې رئیسانو سره غونډه وکړه
د پوهنې وزارت د مالي او حسابداري د رئیس مولوي صدرالدین سعد په مشرۍ، د یاد وزارت د مالي او بودیجې د کمېټې غونډه په داسې حال کې جوړه شوه، چې پکې د لوګر، میدان وردګ، کاپیسا، پنجشېر او پروان ولایتونو د پوهنې رئیسانو سربېره مالي او حسابدارۍ برخې آمرینو هم حضور درلود.
په غونډه کې د يادو ولايتونو پر مالي او بوديجوي مسایلو تفصیلي بحثونه ترسره شول.
د پوهنې وزارت مالي او حسابداري رئيس په خپلو خبرو کې وويل، چې د مالي، تدارکاتي او پوهنیزو پروژو اړوندو پلانونو د پلي کېدو په برخه کې د پرمختګ لپاره لازمه ده، چې د پوهنې مسئولین د ولايتونو له مشرتابه او اړوندو ادارو سره د مالي او حسابداري مسایلو په برخه کې د آسانتياوو برابرولو په موخه، قوي همغږي او همکاري رامنځته کړي.
نوموړي زیاته کړه، چې د پوهنې ریاستونو کلنۍ پروژې دې د اړتیا او اهمیت له مخې په دریو برخو ووېشل شي او هغو پروژو ته دې لومړیتوب ورکړل شي، کوم چې پلي کېدو ته یې لومړۍ اړتیا لیدل کېږي.
د غونډې ګډون والو د خپلو ولایتونو د بودیجې، مالي، تدارکاتو او نورو موضوعاتو په اړه نظرونه تبادله او په پای کې لازمې پرېکړې وشوې.
مراسم د دعائیې په لوستلو سره پای ته ورسېدل.
