د پوهنې وزارت له کارکوونکو څخه د دیني علومو ازموینه واخیستل شوه
د پوهنې وزارت د دعوت او ارشاد رياست مسوولين وايي: د فقهې او ديني علومو د لومړي پړاو ازموينه د پوهنې وزارت د مرکزي څانګو له کارکوونکو څخه د دغه وزارت په جومات کې واخيستل شوه.
د دغه وزارت د دعوت او ارشاد رئیس شیخ مولوي عبدالحی حازم وايي: د دې ازموینې پوښتنې د هغو لیکچرونو له محتوا څخه ترتیب شوې چې هره ورځ د دې ادارې کارکوونکو ته تدریس کېدې.
هغه څرګنده کړه: له دې ارزونې څخه موخه داسلام د مبارک دین له احکامو او اصولو سره د کارکوونکو پوره آشنا کول دي.
د پوهنې وزارت د دعوت او ارشاد رئیس په وینا؛ په ورته وخت کې د هېواد په مرکز او ولایتونو کې د پوهنې په ټولو ریاستونو کې دیني ازموینې پیل شوې، چې ټاکل شوې د یادو ادارو له کارکوونکو څخه ازموینه واخیستل شي.
د شیخ حازم په وینا، هغه کسان چې په دې ازموینه کې لوړې نمرې ترلاسه کوي ستایل کیږي او هغه څوک چې معیاري نمرې نه شي ترلاسه کولی باید ډېره دیني مطالعه وکړي. ترڅو راتلونکو ازموینو ته چمتو شي.
