د پوهنې وزارت له بودیجې څخه په جوزجان ولایت کې د ۱۹ بابه ښوونځیو رغنیزې چارې پیل شوې
د جوزجان ولايت پوهنې رئيس الحاج مولوي سيد حفيظ الله معتصم بالله، د شبرغان ښار په شاوخوا او لسو ولسواليو کې د ١٩ بابه ښوونځيو د بيا جوړولو پروژو پرانیستلو پر مهال وويل: د يادو ښوونځيو د ترميمولو لګښت څه دپاسه ۸ مېلیونه افغانۍ اټکل شوی، چې د پوهنې وزارت له بودیجې څخه تمویلېږي.
نوموړي په خپلو خبرو کې د ښوونیزو آسانتیاوو شتون د نصاب او تدریسي پروسې په کیفیت کې خورا مهم وباله او ډاډ یې ورکړ چې پوهنې وزارت به په دې برخه کې خپلو هلوځلو ته لاپسې دوام ورکړي.
ځایي اوسېدونکو هم په خپلو سيمو کې د ښوونځيو پر بيا جوړېدو خوښي څرګنده او د دغه وزارت د رهبرۍ له هڅو يې مننه وکړه.
