د پوهنې وزارت سرپرست وزیر د یوه کاري سفر په موخه د هېواد شمالي ولایتونو ته لاړ
د پوهنې وزارت سرپرست وزیر مولوي حبیب الله آغا او ورسره مل پلاوي ولایتونو ته د خپلو کاري سفرونو په لړ کې دا ځل د ښوونیزو فعالیتونو د ارزونې په موخه بدخشان او کندز ولایتونو ته لاړل.
د پوهنې وزارت سرپرست وزیر د بدخشان له والي مولوي امان الدین منصور سره له کتنې وروسته په یاد ولایت کې د جهادي مدرسې پرانیسته وکړه.
د نوموړي مدرسې د پرانستلو په مراسمو کې د پوهنې وزارت سرپرست وزیر او د بدخشان والي د ټولنې په اصلاح کې د دیني او عصري علومو پر ارزښت ویناوې وکړې او له ګډونوالو یې وغوښتل، ترڅو علم او پوهنې ته لومړیتوب ورکړي.
په یو بل خبر کې؛
د پوهنې وزرات سرپرست وزیر مولوي حبیب الله آغا ولایتونو ته د خپلو سفرونو په لړ کې پرون کندز ولایت ته ورسېد، چې د دغه ولایت د مشرتابه او د کندز ولایت د پوهنې ریاست او د یو شمېر دولتي ادارو د رئیسانو له خوا یې تود هرکلی وشو.
په پیل کې د پوهنې وزارت سرپرست د دغه ولایت د پوهنې ریاست عمومي وضعیت وارزاوه او د یاد ریاست له رئیس او کارکوونکو سره یې وکتل.
په دې کتنه کې د پوهنې وزرات سرپرست وزیر په دغه ولایت کې د پوهنې ریاست له کړنو او دندو څخه ستاینه وکړه او همدا شان د دې ریاست ستونزې یې یاداشت کړې او د مرستو وعده یې ورسره وکړه.
