د پوهنې وزارت سرپرست د ننګرهار ولایت کوټ ولسوالۍ له مدارسو او ښوونځیو څخه لیدنه وکړه
د پوهنې سرپرست الحاج مولوي حبیب الله آغا او ورسره مل پلاوی چې د پوهنيز وضعیت ارزونې په موخه ننګرهار ولایت ته تللی، نن يې د ياد ولايت کوټ ولسوالۍ اړوندو مدارسو او ښوونځیو څخه لیدنه وکړه.
دغه راز نوموړی کوټ ولسوالۍ ته په رسېدو سره د يادې ولسوالۍ د پوهنې آمر، کارکوونکو، علماوو او د سیمه ییزو ادارو د مسئولینو له تود هرکلي سره مخامخ شو.
د پوهنې وزارت سرپرست د کوټ ولسوالۍ له عالي دارالعلوم سربېره د يو شمېر نورو مدارسو او ښوونځيو څخه د ليدنې تر څنګ، د سيمه ييزو ادارو له مسئولينو، علماوو، قومي مشرانو او د يادې ولسوالۍ د خلکو له استازو سره له نيږدې ليدنې وکړې او له هغوى سره يې د پوهنيزو ستونزو او پرمختګونو په تړاو تفصيلي خبرې اترې وکړې.
همدارنګه نوموړي زياته کړه، چې د پوهنې وزارت اصلي موخه د هېواد بچيانو لپاره د متوازنو ښوونیزو او روزنيزو چوپړونو وړاندې کول دي او د ياد وزارت مشرتابه د دغې سترې موخې رسېدلو ته ژمنه ده.
ورپسې د کوټ ولسوالۍ پوهنې آمر، علماوو، استادانو او اوسېدونکو د پوهنې وزارت د سرپرست هرکلی وکړ او په ننګرهار ولایت کې یې د پوهنې وزارت د پلانونو له پلي کېدو څخه خپل ملاتړ څرګند کړ.
