د پوهنې وزارت سرپرست اروزګان ولایت ته په رسمي سفر ولاړ
د پوهنې وزارت سرپرست الحاج مولوي حبیب الله آغا ارزګان ولایت ته له رسېدو سره سم، د یاد ولایت له والي مولوي عنایت الله«شجاع» او یو شمېر نورو مسئولینو سره په کتنه کې، د پوهنیز وضعیت لاښه والي، د نویو مدارسو او ښوونځیو جوړولو او یو لړ نورو مهمو ښوونیزو موضوعاتو په تړاو تفصیلي خبرې وکړې.
په ورته مهال د ارزګان والي د پوهنې وزارت سرپرست ته د ښه راغلاست ترڅنګ، د پوهنیزو پروګرامونه، راتلونکو پلانونو، ستونزو او اړتیاوو په تړاو نظرونه تبادله کړل او د پوهنیز وضعیت لاښه والي په برخه کې یې د یاد وزارت کړنې وستایلې.
ورپسې د پوهنې وزارت سرپرست د یاد ولایت پوهنې ریاست ته ولاړ او هلته د پوهنې د سیمه ییزه چارواکو له تود هرکلي سره مخامخ شو.
نوموړي د یاد ریاست له مسئولینو او کارکوونکو سره په لیدنه کې د هغوی د ښوونیزو لاسته راوړنو او ورځنیو کړنو په تړاو معلومات ترلاسه کړل او اداري چارې یې له نیږدې څخه و ارزولې.
همدارنګه د پوهنې وزارت سرپرست د ارزوګان مرکز اړوند سیدال خان عالي لېسې څخه هم لیدنه وکړه او د یادې لېسې مسئولینو او ښوونکو ته یې په خطاب کې وویل: تاسو د هېواد د راتلونکي معماران یاست او هیله لرو ترڅو د خپل ځورېدلي ولس لپاره د خدمت یوه ښه نمونه وګرځئ.
په پلان کې ده، چې د پوهنې وزارت سرپرست به د خپل کاري سفر په ترڅ کې، د اروزګان له علماءکرامو، مدرسینو، ښوونکو، او قومي مشرانو سره هم له نږدې وګوري او د یاد ولایت ښوونیز وضعیت به په هراړخیز ډول وارزوي.
په پای کې د اروزګان والي او پوهنې مسئولینو د پوهنې وزارت د پروګرامونو او پلانونو د تطبیق او د ښوونیز بهیر د ودې او لاپراختیا په برخه کې د ملاتړ ډاډ څرګند کړ.
