د پوهنې وزارت د کیفیت تضمین معین د غزني ولایت له یو ښوونځي څخه لیدنه وکړه
د پوهنې وزارت د کیفیت تضمین معین الحاج مولوي عبدالخالق «صادق» د غزني ولایت پوهنې رئیس الحاج مولوي میر نصیر احمد «حسیني» په ملتیا، اندړو ولسوالۍ ته سفر وکړ او د ملا نوح بابا لېسې له ښوونیزو کړنو څخه یې لیدنه او ارزونه وکړه.
د پوهنې وزارت معین په دغه لیدنه کې د زده کړې کیفیت، د ټولګیو وضعیت او په یاد ښوونځي کې د ښوونکو او زده کونکو حاضري ارزونې ترڅنګ، له ښوونکو او زده کوونکو سره په یوه غونډه کې د درسي کیفیت پر لا پياوړتیا او د رسي نظم په رعایتولو ټینګار وکړ او د ښوونځي له مسئولینو یې وغوښتل چې خپلې دندې په مسلکي توګه، د تقوا او صداقت په پام کې نیولو سره ترسره کړئ.
بلخوا د یاد ښوونځي مسئولینو د پوهنې وزارت د کیفیت تضمین معین له لیدنې څخه خوښي څرګنده او ډاډ یې ورکړ چې د نوموړي د لارښوونو په پام کې نیولو سره به زده کونکو ته د سالمې او باکیفیته زده کړې برابرولو لپاره خپله ټوله هڅه وکړي.
