د پوهنې وزارت د کارکوونکو له لوري د هرات ولایت د زلزله ځپلو کورنیو سره د ۱۱ میلیونه افغانیو څخه زیاته نغدي مرسته وشوه

د پوهنې وزارت د سرپرست الحاج مولوي حبیب الله آغا د لارښوونې پر بنسټ، د یاد وزارت د معينیتونو، مسئولینو، کارکوونکو، په ځانګړې توګه د مالي او پرمختیايي څانګو د کارکوونکو، د پوهنې دولایتي ریاستونو د مسئولینو او عامو ښوونکو د یو اسلامي او بشر دوستانه اقدام په ترڅ کې، د هرات ولایت د زلزله ځپلو کورنیو سره د ۱۱ میلیونه او ۳۲۹ زره ۹۷۰ افغانیو نغدي مرسته وکړه. 
یاده مرسته د وروستۍ زلزلې له امله، چې په هرات ولايت کې ترسره شوه او زمونږ په زرګونو هېوادوال پکې شهيدان او ټپيان شول، د یاد ولايت له زيانمنو شويو کورنیو سره ترسره شوه.
د پوهنې وزارت مشرتابه په داسې حال کې چې د افغانستان د قومونو ترمنځ د پیوستون، او ورورګلوۍ څخه ستاینه کوي، د پوهنې وزارت د کارکوونکو په ګډون زموږ د اتل او متحد ملت د احساساتو او خواخوږۍ قدرداني کوي.
دغه راز د پوهنې وزارت مشرتابه د یاد وزارت د مالي او حسابداري رياست د کارکوونکو په ګډون له ټولو هغو مسئولینو او کارکوونکو څخه مننه او قدرداني کوي، چې د یادو مرستو په راټولولو کې یې خپلې نه ستړې کېدونکې هلې ځلې او خدمتونه کړي دي.
ټاکل شوې ده، چې یاده نغدي مرسته د پوهنې وزارت د مشرتابه له لوري په رسمي ډول د شهيدانو او ټپيانو پر کورنيو د وېش په موخه، اړوندو ادارو ته وسپارل شي.