د پوهنې وزارت د ښوونې او روزنې معین پکتیکا ولایت ته د خپل رسمي سفر په ترڅ کې له یو شمېر سرحدي سیمو لیدنه وکړه
د پوهنې وزارت د ښوونې او روزنې معین الحاج مولوي سخاءالله سعید او ورسره مل پلاوی، چې د هېواد سویل ختیزو ولایتونو د سرحدي ولسوالیو د ښوونیز وضعیت په ارزونه بوخت دی، د پکتیکا ولایت د پوهنې رئیس مولوي عبدالوکیل خالد په ملتیا د دغه ولايت سروبي او برمل ولسواليو ته ولاړ او هلته يې د پوهنې له مديرانو، د مدارسو او ښوونځيو له مسئولينو، د علماوو شورا له مرستيال او د يادو ولسواليو له قومي مشرانو سره د ښوونیز او روزنیز وضعیت په تړاو تفصیلي خبرې وکړې.
د پوهنې وزارت معین په دغو ناستو کې د مدارسو او ښوونځیو د لایحې، د پوهنې کیفیت، د ښوونکو تدریسي وضعیت، د ښوونکو عمومي تشکیل، د زده کوونکو احصائیه او په ښوونځیو کې د علماوو د شمېر په اړه له سیمه ییزو مسئولینو څخه معلومات وغوښتل، چې په ترڅ کې یې د ولسوالیو پوهنې آمرینو د پورتنیو موضوعاتو په تړاو هر اړخیز معلومات ورکړل.
دغه راز سیمه ییزو مسئولینو د خپلو ولسوالیو د پوهنې یو شمېر ستونزې او وړاندیزونه لکه: د تشکیلاتو کموالی، د مسلکي ښوونکو کمښت، د مدارسو --- ښوونځیو د ودانیزو پروژو نیمه بشپړېدل، په یوشمېر ښوونځیو کې د څښاک پاکو اوبو نشتوالی او یو لړ نور موضوعات له پلاوي سره شریک کړل، چې ور سره د ستونزو په حل کې د همکارۍ ژمنه وشوه.
