د پوهنې وزارت د ښوونکو د روزنې او مسلکي پراختیا علمي غړو لپاره ۶ ورځنی روزنیز ورکشاپ پیل شو
د پوهنې وزارت له لوري د ښوونکو د روزنې او مسلکي پراختیا علمي غړو د روزنیزو مهارتونو او وړتیاوو لوړولو په موخه ۶ ورځنی روزنیز ورکشاپ، د یاد وزارت د نصاب او د ښوونکو مسلکي پراختیا لوی رئیس الحاج مولوي اول ګل ایوبي، د ښوونکو د روزنې او مسلکي پراختیا رئیس مولوي محمد ابراهیم عمري، مسئولینو، کارپوهانو او استادانو په حضور کې په رسمي ډول پرانیستل شو.
په پیل کې د پوهنې وزارت د نصاب او د ښوونکو مسلکي پراختیا لوی رئیس ګډون والو او حاضرو مېلمنو ته د ښه راغلاست ترڅنګ، د ورکشاپ په اړه هر اړخیز معلومات وړاندې کړل او ویې ویل: د دغه ورکشاپ له پیلولو یې اساسي موخه، د ښوونکو د روزنې او مسلکي پراختیا علمي غړو د مسلکي وړتیاوو او تدریسي میتودونو پياوړتیا، د هېواد په ښوونځیو کې د ښوونکو د مېتودیکي مهارتونو وده او د ښوونیز کیفیت لوړوالی دی.
ورپسې د یاد وزارت د ښوونکو د روزنې او مسلکي پراختیا رئیس مولوي محمد ابراهیم عمري په خپلو خبرو کې د ښوونکو د روزنې او مسلکي پراختیا علمي غړو لپاره د روزنيزو ورکشاپونو جوړولو او لاسته راوړنو په اړه هر اړخیز معلومات وړاندې او د یادو ښوونيزو پروګرامونو پر دوام يې د ټينګار ترڅنګ، له ګډون والو وغوښتل چې د دغه ورکشاپ له زده کړو مهارتونو څخه بشپړه ګټه پورته کړي.
غونډه دعائیې په لوستلو سره پای ته ورسېده.
