د پوهنې وزارت د ښوونکو د روزنې او مسلکي پراختیا رئیس د سرپل ولایت د مسلکي وړتیاوو لوړونې له ورکشاپ څخه لیدنه وکړه
د پوهنې وزارت د ښوونکو د روزنې او مسلکي پراختیا رئیس مولوي محمد ابراهیم «عمري» د سرپل ولایت پوهنې رئیس مولوي محمد رحماني په ملتیا د ښوونکو د مسلکي وړتیا لوړولو له ۸ ورځني ورکشاپ څخه لیدنه وکړه.
یاد ورکشاپ چې د یوې ښوونیزې ادارې په مالي مرسته جوړ شوی، موخه یې د ښوونکو د تدریسي مهارتونو پیاوړتیا او مسلکي وده ده.
د دې لیدنې په ترڅ کې مسئولینو د دغه ډول مسلکي او مېتودیکي پروګرامونو له تنظیم څخه خوښي څرګنده او ویې ویل، چې د یادو ورکشاپونو اصلي موخه د ښوونکو د مسلکي وړتیاوو لوړول او هغه څه چې دوی زده کړي، په ښوونځیو کې پلي کول دي.
دغه راز هغوی ټینګار وکړ، کوم مهارتونه چې په ورکشاپ کې ګډون والو ته ارایه کېږي، باید په عملي ساحه کې ترې بشپړه استفاده ترسره شي.
د يادونې وړ ده، چې د سرپل ولايت د ښوونکو د مسلکي پراختیا غړو د دغه ورکشاپ له جوړېدو خوښي څرګنده او په راتلونکي کې يې د دا ډول ښوونيزو پروګرامونو جوړولو غوښتنه وکړه.
