د پوهنې وزارت د مقام د دفتر لوی رئیس سمنګان ولایت ته ورسېد
د پوهنې وزارت د مقام د دفتر لوی رئیس الحاج مولوي شهاب الدین ثاقب سمنګان ولایت ته د یو رسمي سفر په ترڅ کې، د یاد ولایت له پوهنې رئیس مولوي محراب الدین اقبال سره وکتل.
په دې کتنه کې دواړو لوریو د پوهنې پر ستونزو، ننګونو او راتلونکو پلانونو خبرې وکړې او ورغلي پلاوي د پوهنې د کیفیت پر لاښه والي او په تحصیلي بنسټونو کې ډسپلین ته په پاملرنې ټینګار وکړ.
دغه راز د پوهنې وزارت د مقام د دفتر لوی رئیس د یاد ولايت د ثانويه او مافوق ثانویه مرحلو له آزموينو بهير څخه څارنه وکړه او د دغو آزموينو روڼتیا يې د پوهنې وزارت له مهمو لومړيتوبونو څخه وبلله او په دې برخه کې يې د اصولو او مقرراتو د رعايت غوښتنه وکړه.
باید ووایو، چې دا ډول سفرونه او له آزموینو څخه څارنه د پوهنې وزارت د ژمنتیا ښودنه کوي، کوم چې د تعلیمي نظام لا پیاوړتیا او په ښوونیزو بهیرونو کې د روڼتیا په موخه ترسره کېږي.
