د پوهنې وزارت د مقام دفتر لوی رئیس، د جوزجان ولایت اړوندو دیني مدارسو ازموینې پروسه وڅارله

د پوهنې وزارت د مقام دفتر لوی رئیس محترم شیخ محمد طاووس طارق، د دیني مدارسو د ثانويه او مافوق ثانویه ازموینو څخه د څارنې لپاره، د جوزجان ولایت مرکز شبرغان ته ورسېد.
د پوهنې وزارت د مقام دفتر لوی رئیس، د جوزجان ولایت پوهنې رئیس محترم الحاج مولوي لعل جان راشد په ملتیا، په انقره او ابو عبید جوزجاني جوماتونو کې د پورته ذکر شویو ازموینو له پروسې څخه لیدنه او څارنه وکړه.
دغه راز نوموړي د ازموینې کړنلاره، د ترسره کولو طریقه، نظم، روڼتیا او د ازموینې مناسبې فضا مثبته ارزونه وکړه او د جوزجان د پوهنې ریاست د رهبري او کارکوونکو د اړین چمتووالي او هڅو ستاینه یې وکړه او ټینګار یې وکړ چې د دیني او عصري علومو په برخه کې پرمختګ د ټولنې د اصلاح او د ملک ښې رازۍ لپاره بنسټیز رول لوبوي.