د پوهنې وزارت د مشرتابه پنځمه غونډه ترسره شوه
د پوهنې وزارت د مشرتابه پنځمه غونډه د یاد وزارت د سرپرست وزیر الحاج مولوي حبیب الله آغا په مشري ترسره شوه.
غونډه د قرآن عظیم الشان د څو مبارکو آیاتونو په تلاوت سره پیل شوه او بیا له آجنډا سره سم پر موضوعاتو بحث پیل شو.
د کلیوالي مدارسو لپاره د ترتیب شوي نصاب د تصحیح او چاپ، د جهادي مدارسو د کلنیو ازموینو، د ژمي د رخصتي په مهال د جهادي مدارسو د استادانو د معاشونو د تادیې، د اسلامي زده کړو معینیت لپاره د یوې مناسبې ودانۍ د پیدا کولو او ځینو نورو مسایلو په اړه تفصیلي بحثونه او پرېکړې ترسره شوې.
د اسلامي زده کړو د معین الحاج مولوي کرامت الله اخند زاده په مشرۍ ټاکل شوي کمېسیون ته دنده وسپارل شوه ترڅو د کلیوالي مدارسو د نصاب د کتابونو کتنه او تصحیح بشپړه او چاپ ته چمتو کړي.
د اسلامي تعلیماتو د معینیت لپاره د مناسبې ودانۍ د پیدا کولو موضوع د چارو د ادارې لوی ریاست ته ولېږل شوه ترڅو د کابینې په راتلونکې غونډه کې ورباندې بحث وشي او په اړه یې تصمیم ونیول شي.
د ژمي په رخصتیو کې د جهادي مدارسو د استادانو د معاشونو د تادیې په اړه پرېکړه وشوه چې په یاده موضوع کې دې د اسلامي امارت له مشرتابه څخه هدایت وغوښتل شي.
