د پوهنې وزارت د مرکزي ریاستونو د بالمقطع کارکوونکو د اړتیاوو ارزونه وشوه
د پوهنې وزارت د سرچینو او ادارې د معین الحاج مولوي صبغت الله وصیل په مشرۍ غونډه، د یاد وزارت د یو شمېر مرکزي رئیسانو، مسئولینو او استازو په حضور کې د کاري او عملیاتي پلانونو د پلي کېدو په تړاو جوړه شوه.
په یاده غونډه کې د مرکزي ادارو کاري او عملیاتي پلانونه په دقت سره وارزول شول او د هغو ریاستونو لپاره د متخصصینو او مسلکي بالمقطع کارکوونکو ګمارلو په اړه هر اړخیز بحثونه ترسره شول، چې دندې یې په تشکیلاتو کې د کموالي له امله د ستونزو سره مخامخ شوې دي.
د مرکزي ریاستونو استازو په خپلو اړوندو څانګو کې د بالمقطع مسلکي کارکوونکو د ګمارلو په تړاو، د یو شمېر ستونزو په یادولو سره خپلې اړتیاوې تر څېړلو وروسته ګډون والو ته وړاندې کړې.
په پای کې د متخصصینو له هر اړخیزو بحثونو وروسته د نویو مسلکي بالمقطع کارکوونکو د ګمارلو په برخه کې د اړوندو ریاستونو غوښتنې او اړتیاوې و څېړل شوې او په اړه یې لازمې پرېکړې ترسره شوې.
