د پوهنې وزارت د مدرسینو د مسلکي پراختیا غړو سیمینار پای ته ورسېد
د پوهنې وزارت د اسلامي زده کړو معينيت د مدرسینو مسلکي پراختیا غړو لپاره علمي او ميتوديکي سيمينار چې څه موده وړاندې پيل شوى و، نن ګډون والو ته د تصدیق پاڼو په وېشلو سره پاى ته ورسېد.
په دغه سيمينار کې چې څلور ورځې يې دوام وکړ، د دارالعلومونو او مدارسو د مسلکي پراختیا ٦٠ تنو غړو برخه اخيستې وه، چې د خپلو دندو او نورو اړینو موضوعاتو په هکله ورته روزنه ورکړل شوه.
په پیل کې د پوهنې وزارت د څارنې او ارزونې رئیس مفتي عبدالولي سداد مېلمنو ته د ښه راغلاست په ترڅ کې، د یاد سیمینار د ګټو په اړه معلومات وړاندې کړل او د مدرسینو د مسلکي پراختیا غړو لپاره یې د ښوونیزو پروګرامونو تنظیمول اړین وبلل.
ورپسې د پوهنې وزارت د اسلامي زده کړو معین الحاج مولوي کرامت الله آخندزاده هم هراړخیزې او مفصلې خبرې وکړې او د کارکوونکو د وړتیا لوړونې د پروګرامونو پر دوام یې ټینګار وکړ.
په پای کې د اسلامي زده کړو معینیت رهبري لخوا د یاد سیمینار پر ګډون والو تصدیق پاڼې ووېشل شوې.
