د پوهنې وزارت د لیک لوست د زده کړې ریاست د رئیس په مشرۍ پلاوی خوست ولایت ته ورسېد
دپوهنې وزارت د لیک لوست د زده کړې (سواد آموزي) ریاست د رئیس مولوي محمد ابراهیم عمري په مشرۍ پلاوی د خوست ولایت ته ورسېد او د یاد ولایت د پوهنې ریاست له مسئولینو سره یې ولېدل.
په یاده لیدنه کې دخوست ولایت د مرکز او ولسوالیو د ښوونځیو، د لیک او لوست د زده کړې د مرکزونو، د سیمه ایزو درسي ټولګیو، د چټکو زده کړو د مرکزونو او نورو تعلیمي ادارو د څارنې او ارزونې په پلان تفصیلي بحث وشو. یاد پلاوی په پام کې لري چې د خوست ولایت د پوهنې ریاست او د ولسوالیو د پوهنې د آمریتونو د تدریسي، اداري او مالي چارو بشپړ نظارت او ارزونه وکړي او راپور یې د پوهنې وزارت له مقام سره شریک کړي.
په یاد پلاوي کې د پوهنې وزارت د اساسي او ثانوي زده کړو، احصائیې او د ښوونکو د مسلکي پراختیا د ریاستونو استازي هم شامل دي.
