د پوهنې وزارت د شهادتنامو او علمي شورا ریاستونو پخواني رئیس د پوهنې وزارت له سرپرست سره وکتل
د پوهنې وزارت د شهادتنامو او علمي شورا ریاستونو پخوانی رئیس، شاه محمود منګل چې تازه هېواد ته راستون شوی دی، د پوهنې وزارت له سرپرست الحاج مولوي حبیب الله آغا سره وکتل او د هېواد د پوهنیز نظام په اړه یې ورسره تفصیلي خبرې وکړې.
په پیل کې د پوهنې وزارت سرپرست د شهادتنامو او علمي شورا ریاستونو د پخواني رئیس له راتګ څخه هرکلی وکړ او څرګنده یې کړه، د هېواد پر ځان بساینې او پرمختګ لپاره یوازینۍ لاره داده، چې زموږ ټول علماء او پوهان خپله انرژي همدلته خپل هېواد کې په مصرف ورسوي.
نوموړي څرګنده کړه: هر هغه څوک چې د هېواد بچیانو د ښوونې او روزنې په ډګر کې زموږ سره مرسته کوي، ترې مننه کوو.
په ورته مهال، د علمي شورا او شهادتنامو ریاستونو پخواني رئیس د خپلو خبرو په ترڅ کې، د ښوونیز نظام د پرمختګونو او د پوهنې په برخه کې د تر سره شویو کړنو او لاسته راوړنو باندې خوښي څرګنده او د پوهنې وزارت مشرتابه ته یې له خپل لوري د هر ډول همکاریو ډاډ ورکړ.
