د پوهنې وزارت د سرچینو او ادارې معین د هېواد د مرکز او ولایتونو له پوهنې رئیسانو سره ویډیویي کنفرانس ترسره کړ
د پوهنې وزارت د سرچینو او اداري معین الحاج مولوي صبغت الله وصیل، په داسې حال کې چې د یاد وزارت د مالي څانګو رئیسانو، آمرینو او کارپوهانو هم حضور درلود، د مرکز او ولایتونو له پوهنې ریاستونو سره ویډیویي کنفرانس له لارې، د روان ۱۴۰۳ لمریز کال د لومړیو پینځو میاشتو د بودیجې مصرف په تړاو خبرې وکړې.
د پوهنې وزارت د سرچینو او ادارې معین د یادې غونډې د موضوع په تړاو د مرکز او ولایتونو د پوهنې ریاستونو لنډ راپور واورېد او د هېواد د ۳۴ ولایتونو د پوهنې له رئیسانو یې وغوښتل، تر څو د اړوندو ریاستونو د پروژو کیفیت او تطبیق ته د جدي پاملرنې ترڅنګ، د هغو بشپړولو ته لومړیتوب ورکړي.
دغه راز نوموړي پوهنې رئيسانو ته په خطاب کې وويل: د پروژو په تطبيق برخه کې د ننګونو په صورت کې د خپلو اړوندو ولايتونو د سيمه ييزو ادارو له مسئولينو څخه مرسته وغواړئ او که د ولایتونو په کچه یادې ستونزې هوارې نه شي؛ بیا دغه موضوع د وزارت له مشرتابه سره شریکه کړئ، چې ژر تر ژره یې په حل کې همکاري ترسره شي.
د سرچینو او ادارې معین څرګنده کړه، په پام کې ده، چې ځانګړي څارنیز ټېمونه د پوهنې ریاستونو له پروژو څخه د څارنې په موخه ولایتونو ته سفرونه وکړي.
غونډه د سرچینو او ادارې معینیت له لوري د ولایتونو پوهنې مسئولینو ته د یو لړ لارښوونو او پرېکړو په کولو او دعائیې په لوستلو پای ته ورسېده.
